![](https://www.shkodraweb.com/wp-content/uploads/2019/04/rudina-azem-hajdari.jpg?x87856)
Partia Bindja Demokratike është partia më e re, që sipas gjasave do të krijohet në Shqipëri. Jo vetëm kaq. Ajo do të ketë një grup parlamentar që ndoshta do të arrijë deri në 42 deputetë dhe sipas gjasave, do të marrë “hise” edhe në pushtetin vendor në zgjedhjet e 30 qershorit, gjithmonë nëse do të zhvillohen.
Rudina Hajdari duket se është nismëtare e krijimit të kësaj force të re politike, e cila siç shihet edhe nga emri por edhe përbërja e pritshme, do të jetë “rrjedhje” nga Partia Demokratike. Deri tani, emri tjetër që i atashohet si bashkëthemelues është ai i Astrit Patozit. Ky i fundit, edhe kur Rudina Hajdari ishte pjesë e PD-së, kishte artikuluar mundësinë e krijimit të një partie të re, kur ajo tek e cila bënte pjesë, nuk kishte më hapësira për të.
Burimet mediatike, të cilat duhen marrë me shumë rezerva, flasin edhe për emra të tjerë të ish- lidershipit të PD-së deri në 2013-ën që pritet ti bashkohen Partisë Bindja Demokratike. Kanë nisur të artikulohen emra të kalibrit të Jozefina Topallit, Arben Imamit etj.
Premisat teorike të kësaj force të re politike, janë ndoshta më të favorshmet. As shkëputja e PDr-së së Pollos, nuk ka patur një terren kaq “mikpritës” në nisje, edhe pse “bekimi” i patë i erdhi nga Doris Pack.
Edhe pse pas lëvizjes radikale të djegies së mandateve janë pakësuar, ka sërish të pakënaqur nga lidershipi i Lulzim Bashës në PD. Nga ana tjetër, emrat e ish- “senatorëve” të PD-së që përfliten se mund ti bashkohen, vazhdojnë të kenë mbështetje edhe në strukturat aktuale demokrate. Mbështetja e SHBA-së dhe BE-së janë të dukshme dhe të hapura për eksponentët që pritet të vihen në drejtim të saj. Nuk duhet harruar se edhe qeveria nuk është dhe nuk mund të jetë aq armiqësore me “opozitën e re” në fazën e saj embrionale. Nuk ka dyshim se, nëse kjo parti do të hyjë në zgjedhje, me meritë ose “të dhuruar” do të ketë një copë në “tortën” e pushtetit vendor.
Mbi të gjitha, nismëtare e saj është një zonjë e brishtë por me një mbiemër “të rëndë” mbi supe, atë Hajdari. Rudina, vajza e Azemit i jep jetë një partie të re me mbiemër “demokratike”, gati 29 vite pas Partisë Demokatike të cilën Hajdari e ideoi në vitin 1990, sigurisht jo i vetëm.
Natyrisht, ka edhe faktorë të tjerë që nuk e bëjnë kaq të shtruar rrugën e kësaj partie politike. Nuk besojmë se janë të paktë ata. Të cilët që në kristalizim, mund ta shohin këtë parti politike si “të bekuar” nga Edi Rama, i cili është betuar publikisht se “do ta çojë për skrap PD-në…”. Nga ana tjetër, nëse kjo parti politike do të ngrihet e do të ecë, do ta bëjë mbi “hirin” e Partisë Demokratike, e cila braktisi sistemin dhe po kërkon zgjidhje në sheshe bashkë me mbështetësit e tyre.
Nuk ka dyshim që, nëse Partia Bindja Demokratike futet në zgjedhjet e 30 qershorit (nëse do të arrihet të bëhen) do të marrë kosto jo të vogël, bashkë me pushtetin vendor që mund të përfitojë në administrim. Ata që konsiderohen të djathtë, për të mos thënë anti- socialistë, do ti largohen që në nisje si djalli- temjanit kësaj force politike. Nëse do të vazhdohet me këtë linjë arsyetimi por edhe nëse mandati aktual politikë i qeverisësve do të mbyllet vetëm në 2021-in, vetëm në ato zgjedhje partia e Hajdarit do të kalojë testin real. Deri atëherë, do të konsiderohet si një “Pollo- parti” e dytë, e ngjashme me PDr-në, por sipas gjasave më e fuqishme politikisht e financiarisht.
E në mbyllje, ndoshta janë të shumtë ata që do të donin ti drejtonin vetëm një pyetje Rudina Hajdarit, si vajza e Azemit. A do të qëndronte në parlament Azem Hajdari nëse PD-ja do të merrte vendim për dorëzimin në bllok të mandateve…? A do të ndërmerrte një nismë të ngjashme Azem Hajdari, me atë që sot duket se ka nisur e bija- Rudina? Trajtimi i Azem Hajdarit, në shumë raste e periudha, ka qenë ku e ku më i rëndë se ai me të cilin “u përball” e bija, Rudina! Nga 1990 deri në 1998, Azemi mbajti mbi shpinë, në shumë raste edhe pa të drejtë, shumëçka që nuk e meritonte nga partia që vetë ideoi. E njëjta parti, që për meritat e të atit mori të bijën dhe e ngjiti në krye dhe pa u mbushur dy vite, Rudina Hajdari po e tradhëton në mënyrën më të keqe të mundshme! Po Kiri, vëllai, deklaratat e tij për “rrugë të ndryshme, qëllim të njëjtë”? Apo është akoma “i vogël” për të kuptuar nga politika?! /Shënim i ShkodraWeb/