Ndodh edhe kështu. Një shtetas shqiptar vihet në pranga pas 23 viteve i shpallur në kërkim. Lajmi bëhet i ditur nga Policia e Shtetit, e cila jep detajet. Bëhet fjalë për një 49- vjeçar nga Lezha, i identifikuar si Bardh Lula. Mësohet se ai fshihej në Itali, me emër dhe me dokumentacion si shtetas boshnjak. Tashmë pritet që lezhjani të ekstradohet drejt Shqipërisë, ku do të vazhdojë pjesën e mbetur të jetës pas hekurave përjetësisht.
Finalizohet operacioni ndërkombëtar i koduar “Wanted 3”.
Operacioni i zhvilluar dhe finalizuar në Itali falë bashkëpunimit të Interpol Tirana me Interpol Romën dhe Zyrat ndërlidhëse reciproke UCI Albania në Shqipëri dhe Bari në Itali në bazë të informacioneve të siguruara më parë nga Sektori për Krimet e Rënda në Departamentin e Policisë Kriminale në PSH, për vendndodhjen dhe gjeneralitetet që përdorte i kërkuari.
U bë arrestimi në Itali me qëllim ekstradimi i shtetasit shqiptar:
Bardh Lula (Luli) 49 vjeç, lindur në Lezhë, i cili fshihej në Itali me emër e dokumentacion të falsifikuar si shtetas boshnjak.
Ky shtetas ishte i shpallur në kërkim ndërkombëtar pasi Gjykata e Rrethit Gjyqësor Lezhë, në vitin 1996 e ka dënuar këtë shtetas me “Burgim të përjetshëm” për veprën penale “Vrasje në rrethana të tjera cilësuese”.
Shtetasi Bardh Lula (Luli), më datë 12.06.1993 ka vrarë me armë zjarri për motive të dobëta shtetasit N.L. , P.L. dhe M.L.
Vijonë procedurat për ekstradimin drejt Shqipërisë të personit të dënuar me burgim të përjetshëm.
