Qyteti i Shkodrës është tronditur nga një tjetër ngjarje e rëndë mëngjesin e sotëm. Një shpërthim i fuqishëm është dëgjuar në një nga lagjet periferike, që në Shkodër njihet me emrin “Tepe”. Sipas informacioneve nga uniformat blu, mësohet se një sasi lëndë plasëse ka shpërthyer në orët e para të mëngjesit të së mërkurës, në rrugën “Ali Demi”, në lagjen “Tepe” të qytetit të Shkodrës.
Policia e Shkodrës bën me dije se lënda eksplozive ka shpërthyer në banesën e shtetases Besime Dushi, banuese rezidente në qytetin e Shkodrës. Fatmirësisht, raportohet nuk ka patur të lënduar në njerëz, por nuk mund të thuhet e njëjta gjë për dëmet e shumta materiale.
Menjëherë pas shpërthimit, i cili është dëgjuar në të gjithë zonën kanë mbërritur në vendin e ngjarjes forca të të shumta policisë, ku grupi hetimor ka filluar hetimet në lidhje me zbardhjen e plotë të ngjarjes së rëndë.
Lidhur me hetimet, grupi hetimor ka marrë në pyetje pronaren e banesës, Besime Dushi, për të zbuluar nëse ka patur konflikte të mëparshme me shtetas të tjerë. Para grupit hetmor, Dushi ka deklaruar se jetonte e vetme dhe se kurrë nuk ka patur konflikte personalisht.
Megjithatë, ajo dyshimet kryesore i ka tek një sulm për shkak të detyrës së djalit të saj, Admir Dushi, i cili më herët ka qenë pjesë e strukturave të Policisë së Shtetit, në Drejtorinë Vendore të Policisë së Shkodrës. Ajo ka deklaruar se pak ditë më parë ka marrë një telefonatë anonime, përmes së cilës i është komunikuar se Admiri nuk ka ku të fshihet dhe se nëse kishte ardhur, duhej të paguante borxhin që u kishte.
Pas hetimeve të mëtejshme të Policisë së Shkodrës është zbuluar se lënda plasëse e vënë në banesën e shtetases Besime Dushi, ka lidhje me dy ngjarje të tjera të ndodhura me të birin e saj, Admir Dushi, në vitin 2017.
Konkretisht, në datën 21 gusht të atij viti, Admir Dushi ishtë kërcënuar dhe kanosur nga disa persona, ndërsa pak muaj më vonë, në datën 3 tetor është tentuar që të rrëmbehet me dhunë e bija minorene e Admir Dushit nga disa persona po të paidentifikuar. Strukturat e policisë po punojnë më tej për zbardhjen dhe dokumentimin e plotë të kësaj ngjarjeje të rëndë.
Sot është data 7 janar 2020, ka vetëm një javë që ka nisur një tjetër vit i ri për Shkodrën dhe mesa duket, nuk do të jetë aspak i qetë. Një lajm i keq ky për shkodranët, që edhe sot u zgjuan nën gjëmimin e lëndës eksplozive. /ShkodraWeb Media/