![](https://www.shkodraweb.com/wp-content/uploads/2020/10/simon-gjeta-fnsh-shkoder.jpg?x87856)
Pesë vjet nga rënia në krye të detyrës në Obot të Ri të Shkodrës, është përkujtuar sot Simon Gjeta, ish- komandanti i FNSH- së Shkodër. Ceremonia përkujtimore, në prani të familjarëve, ish- kolegëve, miqve e të njohurve të Simonit, u zhvillua në Varrezat e Dëshmorëve, aty ku prehet dëshmori. Të pranishëm ishin edhe Besfort Lamallari, zëvendësministër i Brendshëm dhe Ardi Veliu, Drejtor i Përgjithshëm i Policisë së Shtetit.
Ngjarja e rëndë ku humbi jetën komandanti i FNSH Shkodër Simon Gjeta, ndodhi me 3 tetor 2015, në Obot të Ri të Shkodrës. Autori i ngjarjes, 56-vjeçari, Ruzhdi Arishta, ka bërë një rezistencë të pabesueshme ndaj forcave të RENEA dhe FNSH, ku u ekzekutua pas 12 orësh rrethim.
Ai ka mbajtur gjatë kësaj kohe i vetëm mbi 200 forca policie, i izoluar në banesën e tij në Obot të Ri. Arishta ka plagosur fillimisht fqinjin e tij dhe pas rrethimit të policisë ka vrarë komandantin Simon Gjeta. Ai ka lëshuar mbi këtë të fundit një breshëri plumbash, 3 prej të cilëve e kanë zënë në qafë e kokë, duke i marrë jetën.
Pas kësaj, 56-vjeçari ka mundur t’i rezistojë policisë gjatë gjithë natës, duke derdhur ndaj tyre rreth 200 plumba, teksa qëndronte i fshehur në aneksin e shtëpisë. Ndërsa, për t’u mbrojtur nga gazi lotsjellës i hedhur nga policia, autori ka përdorur batanije dhe peshqir të lagur.
![](https://www.shkodraweb.com/wp-content/uploads/2020/10/ruzhdi-arishta.jpg?x87856)
Në atë kohë, policia ka përdorur edhe motrën e tij, që ta bindte të dorëzohej. Por, Arishta i është përgjigjur se nëse afrohej, do ta vriste edhe atë. Ndërsa, ka përfunduar gjithçka në mëngjes, rreth orës 07:00, kur forcat RENEA kanë hyrë brenda shtëpisë dhe e kanë ekzekutuar.