Vetëm pak ditë pasi nënshkruan një marrëveshje në përputhje me moralin politik, sot Albin Kurti e Vjosa Osmani kanë publikuar listën e përbashket me 110 kandidatë për të rrezuar establishmentin e korrupsionit në Kosovë me afat skadence në 14 Shkurt.
Pa shumë llogari, pa shumë cic-mice, pa asnjë hezitim e me një qëllim të përbashket, sot ata të dy me shpurën e kandidatëve të përbashkët, janë gati për ti dhënë Kosovës një erë të re politike nëse qytetarët do të dijnë ta lexojnë mirë këtë qasje.
Ajo që po ndodh në Kosovë, si asnjëherë tjetër është një shembull i vetëdijes politike që i vjen si një shuplakë e fortë Lulzim Bashës e Monika Kryemadhit në Shqipëri. Këtu vendi nuk është gati për të rrëzuar establishmentin e vjetër, ama sigurisht që ka një nevojë ulëritëse për të përmbysur një turkoshak si Edi Rama. Sondazhet e thonë, por Luli e Mona duket se nuk pranojnë.
Të ngatërruar në analiza elektorale të vitit të mbrapshtë politik 2017, asnjëri nga të dy e aq më pak garnitura opozitare përreth, nuk po dinë të japin mesazhin e shumëpritur se luftën e kanë me Edi Ramën dhe jo me njeri- tjetrin.
Babëzia elektorale që buron prej bindjes se zgjedhjet janë bërë, Edi Rama ka humbur dhe këta nuk po dinë si të ndajnë pushtetin, e ka pozicionuar koalicionin opozitar në një situatë në kufijtë e qesharakes që rrezikon të shkaktojë të pamendueshmen. Mandatin e 3-të për Edi Ramen! Nëse kjo ndodh, e mos e dhëntë Zoti, në 26 Prill fajin për herë të parë nuk do ta ketë populli, por çifti kryeopozitar Luli- Mona.
Me dy pare mend që nuk u mungojnë, ata të dy mund të mesojnë sot shumë nga Albini e Vjosa të cilët e dinë se çfarë duan për popullin më shumë se çfarë u duhet për vete. As Albini e as Vjosa nuk u ngatërruan në llogari elektorale e aq më pak në pritshmëritë personale, por sinergjinë për të mirën e Kosovës e shkrinë në një dhe për këtë me shumë gjasë ata do ta kenë bereqet për historine e tyre personale e politike.
Një liste e jo 100 tarafe, një frymë, e jo 100 pazare meskine. Populli në Kosove do të dijë të kuptojë!…
P.S. Shqiptarët në Shqipëri e kërkojnë një model të tillë. /Nga Bledian KOKA/
