Një aksident i rëndë, me pasojë humbjen e jetës së një personi, ka ndodhur këtë mbrëmje në Shtoj i Ri të Shkodrës.
Nga të dhënat e para, raportohet se një makinë ka përplasur një person me biçikletë, në aksin Shkodër-Hani i Hotit. Përplasja ka rezultuar fatale për drejtuesin e biçikletës, i cili fatkeqësisht ka ndërruar jetë në spital. Mjeti tip “Fiat”, që e shkaktoi aksidentin drejtohej nga efektivi i policisë, Gjergj Gjeloshi, 26 vjeç.
Paraprakisht raportohet se viktimë ka mbetur 50-vjeçari Agim Shkambaj. Në vendin e ngjarjes ka mbërritur grupi hetimor, i cili është duke punuar për zbardhjen e plotë të shkaqeve të ngjarjes.
Shkodër/Informacion Paraprak
Më datë 29.01.2021, rreth orës 17:30, në aksin rrugor Koplik – Shkodër, në fshatin Shtoj i Ri, Shkodër, automjeti tip “Fiat” që drejtohej nga shtetasi Gj. Gj. 26 vjeç, ka goditur shtetasin A. Sh. 49 vjeç, i cili lëvizte me biçikletë. Shtetasi A.Sh është dërguar në Spitalin Rajonal Shkodër dhe me pas ka ndërruar jetë si pasojë e plagëve të marra.
Drejtuesi i mjetit shtetasi Gj.Gj është shoqëruar në ambientet e DVP Shkodër për veprime të mëtejshme
Veprimet po kryhen me grup hetimor nën drejtimin e Prokurorisë së Rrethit Gjyqësor Shkodër, për sqarimin e rrethanave të aksidentit