Pas drejtorave të policisë në nivel qarku, duket se është radha e rokadës edhe tek zëvendësdrejtorët dhe shefat e komisariateve. Mësohet se kreu i Policisë së Shtetit, Ardi Veliu, ka thirrur këtë të premte në një takim zëvendësdrejtorit e policive dhe shefat e komisariateve.
Kjo lëvizje mund të lexohet si paralajmërim i ndryshimeve të tjera në strukturën e Policisë së Shtetit. Sidomos pas ultimatumit “100 ditor” të kryeministrit Rama, i cili foli për largime, vetëlargime dhe spastrime nga radhët e Policisë së Shtetit.
“Forca e shembullit tuaj është themeli i kësaj faze të re. Nëse ju do të qëndroni me gjithë forcën e shembullit tuaj e nëse ju do t’i ndiqni prioritetet me të gjithë vendosmërinë dhe këtë besim që keni marrë, do ta ktheni mbrapsht, jo te drejtori që ju ka emëruar, as te ministri, as tek unë e as te qeveria, por te populloi shqiptar, brenda pak kohe, gjithçka do të fillojë të lëvizë në drejtimin e duhur për të arritur në një nivel të ri. Unë dua t’ju them se keni 100 ditë kohë. 100 ditë kohë për ta rivënë të gjithë trupën në angazhim maksimal, nga i pari tek i fundit. 100 ditë.
Asnjë ditë më shumë, që qytetarët të marrin frymë shumë të lehtësuar, duke e parë Policinë e Shtetit në një nivel tjetër. 100 ditë. Ky është një objektiv i palëvizshëm në çdo qark.
Në çdo qark, policë rrugorë, komisarë, Shqiponja, skifterë, çakej që rrinë si të infiltruar brenda trupit, duhet të shkojnë para drejtësisë. Në çdo qark! Në 100 ditë!”, tha të enjten kryeministri Edi Rama.
