![](https://www.shkodraweb.com/wp-content/uploads/2022/05/papa-francesku-takim-bujar-spahiu-vatikan.jpeg?x87856)
Bashkëjetesa paqësore ndërmjet feve, në audiencën e Atit të Shenjtë me haxhi Bujar Spahiun, sot paradite. Në qendër të bisedës, edhe marrëdhëniet ndërmjet shtetit e feve dhe kontributi i tyre në ruajtjen e vlerave njerëzore, sidomos në mbrojtjen e familjes si qelizë themelore e shoqërisë.
R.SH. – Vatikan
Minarja e Xhamisë së Et’hem beut dhe kambanorja e Katedrales së Shën Shtjefnit në Shkodër u bashkuan sot në dhuratën, që iu dorëzua Papës Françesku nga kreu i Bashkësisë Myslimane të Shqipërisë, për vizitë në Vatikan. Simbol i asaj bashkëjetese paqësore ndërmjet feve, për të cilën u fol gjerësisht gjatë audiencës së Atit të Shenjtë Bergoglio me Haxhi Bujar Spahiun, sot paradite në Vatikan.
![](https://www.shkodraweb.com/wp-content/uploads/2022/05/cq5dam.thumbnail.cropped.750.422.jpeg?x87856)
Në qendër të bisedës, edhe marrëdhëniet ndërmjet shtetit e feve dhe kontributi i tyre në ruajtjen e vlerave njerëzore, sidomos në mbrojtjen e familjes si qelizë themelore e shoqërisë. U përmend Dokumenti i Abu Dabit mbi vëllazërimin njerëzor, që Myftiu, Haxhi Spahiu, siç i tha Atit të Shenjtë, e promovon dhe e përhap kudo në Shqipëri.
Më pas, kreu i myslimanëve të Shqipërisë u takua me Sekretarin vatikanas për Marrëdhëniet me Shtetet, imzot Paul Richard Gallagher dhe me Kryetarin e Këshillit Papnor për Dialogun Ndërfetar, kardinalin Miguel Ángel Ayuso Guixot.
Në përfundim të takimeve, kryeredaktori i redaksisë shqipe në Radio Vatikan, don David Xhuxha, i drejtoi mikrofonin Haxhi Bujar Spahiut, duke i kërkuar të tregojë përshtypjet e tij pas takimit me Papën.