![](https://www.shkodraweb.com/wp-content/uploads/2022/01/berisha-basha-pd-gjykata-tirane.jpg?x87856)
Gjyqi në Gjykatën e Apelit për legjitimitetin e lidershipit të PD- së, u shty për herë të dytë. Është pala e Alibeajt, ajo që ka bërë edhe ankimimin e vendimit të Gjykatës së Shkallës së Parë, që përmes avokatit e shtyu për herë të dytë.
Nëse shtyrja ishte vetëm një javë herën e parë, tashmë është plot 4 javë, me 6 dhjetor 2022. Shtyrja e dytë e gjyqir nga Alibeaj, tingëllon e çuditshme. Deputetë të PD- së, mbështetës të tij, protestuan para Gjykatës së Apelit për zhvillimin e gjyqit që sipas tyre po zvarritej.
Më e çuditshme është heshtja nga pala tjetër, ajo e Berishës, e cila u zyrtarizua në Shkallën e Parë si legjitime në drjetimin e PD- së. As herën e parë e as sot, nuk ka një reagim të qenësishëm, aq më pak zyrtar lidhur me zvarritjen e gjykimit të çeshtjes.
Ndërsa zhvilloheshin negociata bashkimi për zgjedhjet vendore 2023, zvarritja e vendimit në gjykatë mund të konsiderohej “marrëveshje” e heshtur mes palëve. Mbase, bashkimi do të sillte zgjidhjen e problematikave të njohura pa patur nevojë për gjykata, përmes një marrëveshje me palëve.
Por tashmë është e qartë se të paktën zyrtarisht, negociatat Paloka- Bardhi janë mbyllur me fiasko apo dështim, pa arritur bashkimin për zgjedhjet e 2023- it. Atëherë çfarë po ndodh që çeshtja më e rëndësishme për fatin ligjor të PD- së zvarritet e nuk ka reagim nga anjëra palë?
Jo vetëm në Shqipëri por në mbarë globin, politika lëviz edhe kur në dukje shihet e ndalur. Me gjasë, mes palëve vijon jo vetëm komunikimi por edhe përpjekja për bashkim. Kjo po ndodh në pjesën e padukshme, me ndërmjetësimin e të fuqishmëve, me shumë mundësi, nga bota e biznesit, miq të të dy palëve.
Çeshtja e gjyqit në Apel, me shumë mundësi është faktor plus në këto negociata për njërën palë ose të dyja. Vetëm ky mund të jetë një shpjegim deri diku me atë që ndodhi sot për herë të dytë, nga i njëjti aktor dhe pa arsye të vlefshme në Gjykatën e Apelit në Tiranë. Natyrisht, ka edhe variante të tjera, siç mund të jetë ai i protestës së 12 nëntorit. Pritet të verifikohet forca e Berishës, edhe nga ai vetë. Në stand- by është Alibeaj, Rama dhe me gjasë, edhe Apeli i Tiranës. /Nga Blerti DELIJA/