Partia Demokratike e Shkodrës ka reaguar sot, pasi RTSH transmetoi një kronikë televizive që evidentonte inspektimin e deputetit Benet Beci në kantierin e ndërtimit të moleve në Liqenin e Shkodrës. Në një deklaratë të shpërndarë për mediat, PD Shkodër shkruan:
Shkodra nuk ka nevojë për fasada politike dhe as për vizitor që i rikthehen në momentet kur duan të përfitojnë prej saj. Fatkeqësisht janë të shumtë ata që kanë ndjekur këtë rrugë në këto vite, por që kanë dështuar, pasi shkodranët janë më të zgjuar kur duhet të vendosin. Këto ditë të gjithë kemi qënë dëshmitar se si një deputet i qarkut Shkoder, na u shfaq befas duke inspektuar e propaganduar për projekte që po zbatohen në këtë rajon. I hyrë në lojë për t’u reklamuar në prag të fushatës elektorale për zgjedhjet vendore të 14 Majit, ai po luan çdo gur të mundshëm për të rënë në sy të qytetarëve, që shumë prej tyre kishin harruar edhe se ai i përfaqëson në kuvend.
Rasti më i fundit ishte ky i këtij fillim viti, kur deputeti Benet Beci kishte marrë rolin e supervizorit dhe fliste për investimin që po realizohet në brigjet e liqenit të Shkodrës për ndërtimin e molove turistike. Një investim ky i ardhur tërësisht nga fondet e huaja që lidhen drejtëpërdrejtë me taksapaguesit europian, e ku Bashkia Shkodër është një prej përfitueseve dhe partnereve, ashtu siç janë “Rajoni i Pulias dhe ai Molise”, si dhe Bashkia “Bar” në Mal të Zi. Projekti Almonit – Financuar nga Bashkimi Europian, përmes Programit IPA Adriatik CBC Itali – Mali i Zi – Shqipëri ka dy orientime kryesore që deputeti në fjalë duhet t’i dijë:
– 1 lidhje multimodale transporti ujor të brendshëm ndërmjet Shqipërisë dhe Malit të Zi në liqenin e Shkodrës
– 2 lidhje multimodale transporti detar midis porteve të Bari Trani, Barletta, manfredonia, mattinata, Vieste dhe midis porteve të Termoli-Vieste.
Përzgjedhja e Bashkisë Shkodër dhe territorit të saj për realizimin e këtij projekti me shumë vlera, duke rikthyer lundrimin në liqenin e Shkodërs si në vite e mëparshme, rezulton në linjë me planet e zhvillimit të Bashkisë Shkodër, që të gjithë kemi qënë dëshmitar se si janë prezantuar përpara opioninit publik në planet e zhvillimit afatmesëm. Përveç zbatimit me rigorozitet të proçedurave që lidhen me pushtetin vendor, duke nisur nga hapi i parë e deri tek i fundit që është zbardhja e lejeve, Bashkia Shkodër gjithashtu ka informuar qytetarët e saj përmes takimeve konsultative publike.
Zbatimi nga Fondi Shqiptar i Zhvillimit, institucion shtetëror të cilin Beci e ka drejtuar, nuk e legjitimon në asnjë rast këtë “show” ku ish titullari tenton ta shesë si meritë të tijën, duke e përdorur më pas për kredo politike. Asnjë “ISH” funksionarë apo edhe funksionar nuk mund të flasë me gjuhën e “unit” për investime që realizohen qofte me paratë e taksapaguesve shqiptarë, e aq më pak me paratë e qytetarëve europian, që Shqipëria i përfiton përmes këtyre projekteve ndërkombëtare me bashkinë.
Zoti Beci dhe qeveria që ai përfaqëson janë mësuar ta bëjnë këtë gjë në gjithë këto vite, sepse kanë patur rastin të shpërdorojnë sa herë ju është dhënë mundësia, pa pyetur se kë kanë përballë. Në Shkodër deputeti në fjalë e di që lojëra të tilla marrin përgjigjen e merituar, prandaj e ftojmë t’i lërë këto shfaqje, pasi të gjithë ja kujtojnë premtimet e mëdha të fushatës së 2021-shit, kur premtonte rrugën e Komanit që ta bënte me lekët e KESH dhe ministrja e qeverisë së tij ja rrëzoi këtë investim, duke e cilësuar jo strategjik. Fushata do kohë të nisë dhe nëse do të jetë kandidat zyrtar, ka kohë mjaftueshëm për të shpalosur premtime, e pse jo të listojë edhe mos investimet që në këto 9 vite qeveria që ai përfaqëson nuk ka bërë për qytetin më të madh të veriut.
Zoti Beci tani që po vjen më shpesh nga Tirana në Shkodër, e di që duhen 4 orë për të përshkuar më pak se 100 km rrugë, e pastaj sapo hyn në qytet përballet me një Urë që nuk është çudia të shëmbet nga amortizimi, për të vazhduar me hyrjen e qytetit etj etj. Lista është e gjatë dhe do të kemi kohë t’i ballafaqojmë qytetarët me këto të verteta që i dijnë fare mirë, por ka nevojë t’i mësojë edhe deputeti i qarkut. E në fund por jo nga parëndësia, deputeti Beci të ndalë përdorimin e institucioneve shtetërore në funksion të fushatës së tij siç është rasti flagrant i Radio Televizionit Publik Shqiptar. I bëjmë thirrje drejtues të RTSH të mos kthehen në autopolant të qeverisë pasi paguhen nga taksapaguesit shqiptar për informimin e opinionit publik në mënyrë të paanshme dhe profesionale dhe jo për të mbuluar fushatën e PS.
Në kronikën e transmetuar nga RTSH evidentohej se “Projekti i 3 moleve, me financim te Fondit Shqiptar te Zhvillimit, eshte investimi qe do te krijoje kompleksin e lundrimit ne liqenin e Shkodres. Ky investim qe shenon edhe fazen e dyte te nderhyrjes ne zonen e shirokes, pas reabilitimit te plote te sheshit, do ti jape formen dhe vemendjen e duhur Shirokes.
Per te inspektuar ngq afer punimet, ka qene vetë deputeti Benet Beci i cili është edhe iniciatori i këtyre investimeve që kanë prekur zonën e Shirokës që me reabilitimin e sheshit dhe tashmë me ndërtimin e 3 moleve. Ai është njohur nga afer me ecurine e punimeve.
Deputeti Benet Beci, u shpreh se ky investim i paraprin nderhyrjeve te tjera ne kete zone qe nisin me 3 molet, ndertimin e rruges Shiroke – Zogaj, investimet e tjera pergjate bregut te liqenit, dhe ne prespektive studimin per thellimin dhe berjen e parshtatshme per lundrim te lehte te lumit Buna.
Qëllimi i përgjithshëm i projektit është të rrisë lidhshmërinë ndërkufitare. Me konkretisht, infrastruktura të transportit ujor në Liqenin e Shkodrës, do të investohen në Shqipëri e Mal të Zi për të nxitur edhe lundrimin ndërkufitar nga Virpazari ne Mal te Zi deri ne Shkoder duke i dhene nje perspektive te re zhvllimit te turizmit ne zone.”.
