![](https://www.shkodraweb.com/wp-content/uploads/2023/03/keshilli-i-pd-1024x536.jpeg?x87856)
Këshilli Kombëtar i thirrur nga Sali Berisha ka vendosur sot që kandidatët e zgjedhur nga “Primaret” të hyjnë në zgjedhje, por me koalicion. Burimet bëjnë të ditur se koalicion do të orientohet që të bëhet me parti të djathta.
Vendimi për t’u futur në koalicion erdhi dy ditë pas vendimi të Gjykatës së Apelit, e cila i dha vulën e PD, grupit të Alibeajt.
Deputeti i PD, Edi Paloka u shpreh pas përfundimit të mbledhjes së Këshillit Kombëtar, se koalicioni do te behet me parti si PL apo PBDNJ, ndërsa theksoi se regjistrimi do te behet qe neser.
“Ne do të hyjmë në zgjedhje. Një nga format ishte ajo e hyrjes në zgjedhje me koalicion. Kishte edhe zëra për hyrje në zgjedhje me kandidatë të pavarur dhe me koalicion, por që nuk kishte mbështetje të gjerë. Këshilli sot mori vendim që do të hyhet me koalicion. Ngarkoi kryesinë për t’u marrë me këtë çështje.
Janë disa parti me të cilat ne kemi marrëveshje. Këto janë teknikalitete që zgjidhen edhe nga kryesia. Kodi zgjedhor ka disa pika që e lidh partinë me numrin e deputetëve që ka në Kuvend, etj. Partitë që ne kemi marrëveshje janë PL, Partia për të Drejtat e Njeriut, etj. Kjo ju takon specialistëve, ne do të ndjekim të gjitha afatet dhe që nesër do të kemi regjistrimin e koalicionin tone”, është shprehur Paloka.