![](https://www.shkodraweb.com/wp-content/uploads/2023/04/kujtim-domnori-inxhieri-i-heceve-2023-1024x537.jpg?x87856)
Sot dua të ndaj jo vetëm me miqtë por edhe opinionin shkodran për një humbje të madhe nga ndarja nga jeta e shokut, mikut, njeriut të mirë, familjarit të përkushtuar, inxhinierit të talentuar Kujtim Damnorit. Një djalë prej familjeve më të mira shkodrane, i biri i Jahja Damnorit, burrit të ndershëm, veteranit të arsimit kombëtar që dha një kontribut për arsimin në viset më të largëta të vendit, në Dibër por edhe në hapjen e shkollave në Ulqin dhe me kontribut edhe në arsimin shkodran.
Kujtimi ishte inxhinieri i hidrocentraleve ku në Fierzë ishte drejtor kantieri ku dha kontributin e tij, në hidrocentralin e Komanit duke qenë kryeinxhinier kantieri punoi me një ndërgjegje dhe përkushtim atdhetar. Por edhe në Shkodër ai duke punuar në Ndërmarrjen Banesa Shkodër, dha kontribut të jashtëzakonshëm në ndërtimin e banesave parafabrikate por edhe në mirembajten e qindra banesave të qytetit. Kontributi i tij deri në fund në ndertim, ka qenë edhe në firmat private në ndertimin e veprave të artit të rrugës Shkodër- Lezhë, etj.
Une sot jam shumë e lumtur që biografinë e Kujtimit e kam në librin “Qyteti që lindi nga një kështjelle- Histori ndërtimore e qytetit të Shkodres” për ta kujtuar veprën e tij jo vetëm familja dhe trashëgimtarët e tij por edhe për t’ju bërë të njohur autoriteteve lokale dhe qendrore që kurrë nuk i vlerësuan herojtë e ndërtimit të veprave që janë ndërtuar në Shkodër por edhe sakrificat e punës së tyre në veprat hidro- energjitike të vendit.
Kujtim, ti i le Shkodrës ashtu si e ke emrin kujtimin dhe opinionin e njeriut të mire dhe punëtor, inxhinierit të afte, të ndershëm, të aftë dhe shumë të ndërgjegjshëm. I përjetshëm qoftë kujtimi për ty! Qofsh i xhenetit! /Nga Zenepe DIBRA, publikuar në Facebook/