Zbardhet kallëzimi i depozituar në Prokurori nga gjyqtarja Arnisa Këlliçi ku deklaron se është kërcënuar. Në shkresën e siguruar nga gazetari Igli Çelmeta, gjyqtarja thotë se është kërcënuar në mënyrë indirekte nga Adrian Dyrmishi.
Sipas saj, ka marrë dy kërcënime, ku njëri prej tyre thotë se dyshon që ka ardhur nga Prokurori Dyrmishi.
Kërkesë:
Tiranë, më 26.01.2024.
Drejtuar: Prokurorisë pranë Gjykatës së Shkallës së Parë Tiranë
Prokurore Deniona Katro,
Unë gjyqtare Arnisa Këlliçi, kam depozituar kallëzim në lidhje me dy kërcënime të kryera kundrejt meje.
Sot më datë 26.01.2024, në deklarimet e dhëna përpara jush si Prokurore dhe OPGJ-së, kam bërë me dije se dyshoj që njëri prej kërcënimeve ka ardhur indirekt (nëpërmjet Kancelarit të Gjykatës) nga Prokurori Adriano Dyrmishi, i cili ushtron detyrën pranë Prokurorisë suaj.
Po ashtu, pas identifikimit nga hetimet e deritanishme të datës se kur letra kërcënuese e ardhur kundrejt meje është përcjellë në zyrën time, kam bërë me dije se Prokurori ka qenë pikërisht në atë datë në zyrën time.
Duke patur parasysh këtë fakt, si dhe në kushtet kur jam gjyqtare e po së njëjtës Gjykatë, në bazë të neneve 78 e 84 të Kodit të Procedurës Penale, kërkoj deklarimin e mungesës së kompetencës së Prokurorisë suaj dhe dërgimin e akteve një Prokurorie të ndryshme më të afërt.
Me vlerësim për punën tuaj të deritanishme dhe me konsideratë,
Gjyqtare Arnisa Këlliçi
