![](https://www.shkodraweb.com/wp-content/uploads/2024/05/benet-beci-2024-1024x537.jpg?x87856)
Shkruan në Facebook kryetari i i Bashkisë Shkodër Benet Beci: Një vit më parë, më 14 maj 2023, pata privilegjin të merrja besimin e shumicës së qytetarëve të Bashkisë Shkodër, për të qenë kryetari i tyre në katër vitet e ardhshme.
Çdo ditë e më shumë bindem se ajo që na bëri kaq të shumtë në numër ishte dëshira, nevoja e shpresa se bashkë mundeshim me e jetu, ndërtu e me ua tregu të gjithëve se sa është Shkodra pozitive.
Me këtë lajtmotiv, duke qenë thellësisht falënderues për besimin tuaj, bashkë më stafin zgjodhëm pikërisht këtë ditë, për të nisur një rrugëtim audiovizual, përmes kanalit në youtube dhe rrjeteve sociale.
Njerëzit e Shkodrës, traditat, simbolet, natyra, trashëgimia kulturore, arti, sporti, historia e shkenca, çdo gjë e lindur në Shkodër, do të vijë në formën e reportazheve dhe intervistave që do të synojnë të “heqin pluhurin” e harresës e të hedhin dritë mbi këdo e çdo gjë me vlerë që ka Shkodra.
Duam të promovojmë më të mirën, të nxisim të rinjtë ta duan e ta vlerësojnë vendin e tyre, por edhe të krijojmë një fond të dokumentuar të njerëzve që jetojnë përditë me bindjen se për ta është #shkodraepara.
Në këtë link gjeni premierën sonte në orën 21:00, një reportazh kushtuar “Sahatit të Qytetit” dhe njerëzve që e ndërtuan, mbrojtën dhe e risollën në jetë pas më shumë se 30 vitesh.
Faleminderit shumë të gjithëve!