Pak para largimit nga Shqipëria, ambasadori amerikan, Donald Lu zhvilloi një takim lamtumire edhe me Prokuroren e Përgjithshme të Përkohshme Arta Marku. Zyra e shtypit të Prokurorisë ka dhënë detaje mbi takimin që u zhvillua ditën e djeshme. Prokurorja e Përgjithshme dhe zyrtarët amerikanë theksuan rëndësinë që ka bashkëpunimi mes Prokurorisë dhe agjencive ligjzbatuese të Shteteve të Bashkuara.
Nga ana e tij, ambasadori Lu vlerësoi maksimalisht rolin, gatishmërinë dhe përgjegjshmërinë e Arta Markut në një periudhë të rëndësishme për zbatimin e legjislacionit të ri të reformës në drejtësi.
Prokurorja e Përgjithshme i uroi punë të mbarë zotit Lu në detyrën e re dhe vlerësoi rolin e tij dhe të ambasadës amerikane për promovimin, hartimin dhe miratimin e reformës në drejtësi.
Njëkohësisht, Prokurorja e Përgjithshme i uroi mirëseardhjen në Shqipëri zëvendësambasadores së re Leyla Moses-Ones, duke nënvizuar vendosmërinë për thellimin e punës së përbashkët për të ardhmen, në luftë kundër kriminalitetit.
Donald Lu u largua nga Shqipëria pas përfundimit të mandatit diplomatik si ambasador i Shteteve të Bashkuara të Amerikës në Tiranë. Diplomati amerikan ishte ndër insistuesit kryesorë të një prej reformave më të rëndësishme në Shqipëri atë në sistemin e drejtësisë.