![](https://www.shkodraweb.com/wp-content/uploads/2019/03/millja-pjetri.jpg?x87856)
Çesk Millja nuk është më prefekti i Qarkut të Shkodrës. Ish- ushtaraku i lartë që mori postin në shtator 2017, duhet ti lirojë karriken e tij Valdrin Pjetrit. Ky i fundit ishte në krye të Hipotekave të Shqipërisë, të cilat dje u shkrinë në një me ALUIZNI-n, duke krijuar Agjensinë e Kadastrave që do të drejtohet nga Artan Lame.
Praktikisht, Pjetri nuk do të qëndrojë asnjë orë “i papunë”, duke marrë postin që u la nga Çesk Millja. Po cilat janë arsyet që sollën këtë lëvizje të papritur nga kryeministri Rama?
Në prag zgjedhjesh, hamendësimet janë të shumta. Nga drejtor i përgjithshëm i Hipotekës në Prefekt Qarku, në pamje të parë duket si “ulje në detyrë”. Nga ana tjetër, lëvizje të tilla në kohë fushatash, krijojnë idenë e amplifikimit të një figure për tu futur në një garë tjetër. Gara më e afërt është ajo e 30 qershorit.
Prej muajsh po artikulohen emra të shumtë kandidatësh për Bashkinë e Shkodrës nga rradhët e PS-së. Senida Mesi, Astrit Beci, Genc Berhani dhe ndonjë bisnesmen i njohur në Shkodër, po përfliten brenda strukturave dhe jashtë tyre si kandidatë të mundshëm, në mes frikës për të kandiduar dhe dëshirës së paplotësuar. Emri i Valdrin Pjetrit mund të rreshtohet në këtë listë. Problemi i vetëm mund të jetë hapësira e ngushtë kohore në dispozicion për të shfrytëzuar postin e prefektit për të krijuar PR në shërbim të kandidimit për kryetar bashkie në Shkodër. Nga ana tjetër, Pjetri, i datëlindjes 1981, ka punuar në shumë institucione, por që të gjitha qendrore dhe jo në kontakt me qytetarët e Shkodrës, ashtu siç preferojnë zakonisht partitë politike. Më herët, nëse do ti futet garës për Bashkinë e Shkodrës, Pjetri duhet të llogarisë edhe përçarjen diku të dukshme dhe diku jo shumë të dukshme në degën e PS-së Shkodër, të cilat nëse nuk amortizohen, reflektojnë probleme të thella si në rastin e zgjedhjeve të 2015-ës.
Nuk është sekret se Edi Rama është akoma i pavendosur në përcaktimin e emrit të kandidatit në bastionin historik të PD-së, ku humbja është thuajse e garantuar. Edhe sondazhet telefonike me emrat e mësipërm e të tjerë, akoma nuk kanë kristalizuar bindjen e kryeministrit për kandidatin e Shkodrës. Nuk përjashtohet mundësia, që duke njohur mënyrën e veprimit të Ramës në raste të tilla, të sjellë një emër totalisht të padëgjuar më parë. Aq më shumë, kur tani nuk ka asnjë aleat me të cilin të konsultohet, siç ndodhi në zgjedhjet e 2015-ës, të cilat siç dihet i humbi. /ShkodraWeb/