Dokumenti sekret i 14 prillit 1985, me bisedat e përgjuara në burgun e Qafë Barit… Çfarë thonin mes tyre të burgosurit, pasi dëgjuan lajmin e vdekjes së diktatorit… Lajmi i vdekjes së Enver Hoxhës depërtoi menjëherë brenda qelive të burgjeve, pothuaj në gjithë Shqipërinë, ditët e para të prillit 1985. Për të burgosurit politikë ky ishte një lajm ngazëllues, pasi përkthehej si përshpejtim i rënies së regjimit. Pavarësisht atmosferës mortore nën muzikën funebre, të burgosurit nisën të shprehen hapur mes tyre e të bënin parashikime për të ardhmen. Por, ata nuk e dinin se të gjitha bisedat mes tyre nëpër qeli po përgjoheshin. Armata e spiunëve kishte regjistruar çdo frazë të gjithësecilit prej të burgosurve, duke i transmetuar në kohë rekord, deri në instancat më të larta të Ministrisë së Brendshme.
Me komentet e të burgosurve, ministria hartonte raporte çdo ditë dhe jua përcillte krerëve të Komitetit Qendror.
Një prej raportimeve është ai për të burgosurit e Qafë Barit, i datës 14 prill 1985. Ata pra, bënin prognoza mbi të ardhmen e afërt të realitetit politik pas vdekjes së Enver Hoxhës dhe nën atmosferën e kësaj vdekjeje. Parashikimet e tyre dolën rreth 5 vjet më vonë nga ngjarja, dhe ajo që bën përshtypje është analiza e saktë politike që ata bëjnë bash në momentet kur rrugët dhe sheshet e Shqipërisë ishin mbushur me njerëz të indoktrinuar, shkrehur në lot e britma për udhëheqësin.
Republika Popullore Socialiste e Shqipërisë
Ministria e Punëve të Brendshme
Drejtoria!
Sekret
Ekzemplar nr.4
Tiranë më 14.4.1985
Lënda: Për disa komente armiqësore të të dënuarve në repartin e riedukimit nr.311 Qaf-Bari-Pukë.
Shokëve: Ramiz, Adil, Simon
Nga të dhënat operative del se lidhur me vdekjen e udhëheqësit kryesor të Partisë, kanë komentuar armiqësisht 9 të dënuar politikë që vuajnë dënimin me heqje lirie në repartin e riedukimit nr.311 Qaf-Bari të Pukës të cilët janë shprehur:
“…Tani kaq e pati kjo histori, deri këtu, tani mbaroi me kaq, do të dalim nga burgu, asnjë vit nuk e mbushim. Kjo pritej prej vitesh këta do të hanë kokën e njëri-tjetrit, tani prit nga dita në ditë të vijnë jugosllavët, ata këtë ditë kanë pritur.
Do të kemi ngjarje të jashtëzakonshme këtej e tutje… E patë, i madhi mbaroi, mbaruan edhe këta. Lum ai që nuk i ka bërë kujt keq e mjerë ai që i ka bërë keq të tjerëve, se do t’i paguajë të gjitha.
…forca e madhe dhe orteku i madh u përmbys… Iku dhe mori fund diktatura e proletariatit, tani në botë çdo gjë do të ndryshojë, ishalla do të ketë ndonjëjgjë edhe për neve. Deri në fund të vitit do të dalim dhe nuk do të ketë më burgje politike… kaq e pati burgu i jonë, kushdo që të hypë do të na nxjerrë”.
Ministri i Punëve të Brendshme, Hekuran Isai /Kujto.al/
