Ramazan Raja, nipi i deputetit të Partisë Socialiste, Rahman Rrajës, është dënuar me 12 vite burg në Belgjikë. Lajmin e kanë bërë të ditur mediat e huaja, sipas të cilave gjykata në Antwerp vendosi një dënim prej 3 vitesh më shumë nga sa kishte kërkuar Prokuroria për krerët e grupit.
Ai ishte i përfshirë në një organizatë të trafikut të drogës shqiptaro-letoneze që tregtonte miliona euro kokainë, në portet e Antwerpen dhe Vlissingen.
Gjatë gjykimit, Prokuroria Publike e kishte portretizuar grupin kriminal të letonezit Kaspars N. si një organizatë kriminale të fuqishme që nxirrte fitime të mëdha nga kontrabanda dhe trafikimi i kokainës.
Për të vërtetuar akuzat, prokuroria publike iu referua kutive të mbushura me para të drogës, fotove të pakove të drogës, konfiskimit të orëve luksoze dhe faktit që organizata mund të thërriste një oficer policie të korruptuar.
Hetuesit arritën të binin në gjurmët e grupit kriminal falë pajisjeve të përgjimit që kishin vendosur në banesën e kreut të grupit në Berchem.
Gjithashtu bëhet me dije se organizata mund të lidhet me tre grupe kokaine të tjera që ishin në përgjim. Hetuesit dëgjuan Kaspars N. dhe shqiptarin Ramazan Rraja duke folur për një kontejner që ndodhej në kalatën 1742. Një kontenier me banane që tashmë ishte kontrolluar nga dogana, por pa rezultat. Gjatë një kontrolli të ri, doganierët gjetën në tavanin e kontenierit një grumbull prej 57 kilogramësh kokainë.
Edhe një kapje e 50 kilogramëve kokainë në Vlissingen në Holandë dhe një tjetër e 80 kilogramëve në Civitavecchia italiane pranë Romës, ishin gjithashtu të lidhura me grupin. Kryesisht droga merrej nga Ekuadori, zona e preferuar e punës së kriminelëve shqiptarë të drogës.
Telefonat celularë të anëtarëve të bandës siguruan material fotografik të shumtë për hetuesit. Shtretër hotelesh plot me para, foto jahtesh luksoze dhe orë me vlerë 655 mijë euro. Ata panë gjithashtu shumë foto të pakove të kokainës. Sipas prokurorit publik, i dyshuari kryesor Kaspars N. gjithashtu investoi në një restorant pokeboël në Antwerp. “Në këtë mënyrë organizata ka investuar para kriminale në ekonominë e rregullt”, ka thënë kryetarja e aktgjykimit në gjykatë.
Gjykata vendosi ta dënojë organizatën shumë më ashpër sesa kishte kërkuar Prokuroria Publike. Udhëheqësi Kaspars N. u dënua me dymbëdhjetë vjet burg dhe 48 mijë euro gjobë. Përveç kësaj, ai duhet t’i dorëzojë shtetit belg 2.8 milionë euro pasuri kriminale. Me 12 vjet burg janë dënuar edhe dy “togerët” e tij dhe me 40 mijë euro gjobë. Anëtarët e tjerë të organizatës morën dënime nga katër deri në shtatë vjet burg.
