Rreth orës 19.30 të mbrëmjes së sotme, Tirana është tronditur nga një ngjarje e rëndë. Janë derdhur breshëri armësh ndaj një makine tip “Audi” të bardhë, ku mbetën të vdekur drejtuesi dhe pasagjeri. Drejt vendngjarjes, në zonën e Astirit janë nisur disa autoambulanca. Ndërkohë makina tip “Audi” mbi të cilën janë derdhur plumbat mbante targën AB008EM.
Ndërkohë, edhe policia është në vendngjarje për të zbardhur ngjarjen e rëndë. Paraprakisht, njëra prej viktimave është identifikuar si Erigers Mihasi, rreth 32 vjeç. Me pas edhe personi i dytë është identifikuar si Armando Dumani, 26 vjeç.
Ky i fundit, nuk është një emër i panjohur për drejtësinë shqiptare. Ai është arrestuar më parë pasi dyshohet se është autori i dyshuar i një sërë vjedhjesh me armë në filiale bankash në qytetin e Vlorës.
Erigers Mihasi, është një personazh i njohur i botës së krimit i liruar në muajin korrik 2019 nga Prokuroria e Gjirokastrës për mungesë provash në ngjarjen e dhunimit dhe grabitjen e prindërve të Elton Çiços.
NJOFTIMI I POLICISË
Rreth orës 19:30, në vendin e quajtur “2 rrathët” në Unazë të Re, dyshohet se është qëlluar me armë zjarri në drejtim të mjeti tip “Audi”. Si pasojë kanë humbur jetën dy shtetas ende të paidentifikuar, të cilët ishin brenda në mjet.
Menjëherë shërbimet e Policisë kanë shkuar në vendngjarje dhe po kontrollojnë zonën me qëllim identifikimin dhe kapjen e autorit/ve.
Ndërkohë janë ngritur disa pika kontrolli në hyrje dhe dalje të qytetit të Tiranës.
Grupi hetimor nën drejtimin e Prokurorisë punon për sqarimin e plotë e rrethanave të ngjarjes dhe grumbullimin e çdo prove që do çojë në identifikimin dhe kapjen e autorit/ve.
