![](https://www.shkodraweb.com/wp-content/uploads/2018/02/arrestimTr.jpg?x87856)
Nga vrasjet që ndodhin dhe gjithçka tjetër e kupton se armët nuk janë mbledhur kurrë në Shqipëri. E këtë e vërteton edhe zbulimi në Tiranë i një baze me armë dhe municion luftarak, të cilat përdoreshin për veprimtari kriminale.
I arrestuar pas këtij zbulimi është Ramazan Alla, 64 vjeç, banues në Tiranë (i dënuar më parë për “Prodhim dhe mbajtja pa leje e armëve dhe municionit luftarak).
Ky shtetas kishte përshtatur banesën e tij në një bazë e cila iu shërbente grupeve kriminale apo personave që merren me veprimtari kriminale për furnizim me armë zjarri.
Gjatë kontrollit të ushtruar u gjetën dhe u sekuestruan në cilësinë e provës materiale :
– 3 armë zjarri (automatik model 56 dhe dy pushkë gjysmë automatike).
–4 armë zjarri të çmontuara (3 snajpera dhe 1 armë sportive).
– dy armë sportive.
– municion luftarak i llojeve të ndryshme, silenciator dhe pjesë të ndryshme armësh zjarri.
Ndërsa, policia nuk ka bërë të ditur të dhëna të tjera për arsye hetimit, teksa materialet iu referuan Prokurorisë së Rrethit Gjyqësor Tiranë në ngarkim të shtetasit të lartpërmendur për veprat penale të “Mbajtja pa leje e armëve luftarake dhe e municioneve” dhe “Prodhimi dhe mbajtja pa leje e armëve të ftohta”, parashikuar nga nenet 278 dhe 279 të Kodit Penal.