Mbrëmjen e sotme është arrestuar shtetasi Gentjan Funiqi, alias Gentjan Martini, alias Festim Olomani, i ishte shpallur në kërkim si personi i cili së bashku me Dritan Redhelin, të dy të njohur si bosë të drogës urdhëruan rrëmbimin e Jan Prengës.
Policia ka dhënë detaje mbi operacionin dhe ka sqaruar se Funiqi qarkullonte me dokumentacion të rremë. në momentin e ndalimit ai është prezantuar si shtetas bullgar.
Kujtojmë se Prenga u rrëmbye e më pas u vra në vitin 2020 në Durrës, ndërsa dyshimetjanë se ngjarja ndodhi si pasojë e përplasjeve për trafikun e kokainës.
Kopshtari i resortit ku u vra Jani Prenga, Festim Bexhdili u dënua me burgim të përjetshëm.
Njoftimi i policisë:
Finalizohet, brenda 24 orëve të fundit, një tjetër operacion ndërkombëtar për kapjen e personave me rrezikshmëri të lartë shoqërore, të shpallur në kërkim ndërkombëtar.
Operacioni policor i koduar “Seville” u zhvillua nga Policia spanjolle, në bashkëpunim me Policinë shqiptare.
Falë bashkëpunimit dhe shkëmbimit të informacionit në kohë reale, mes Policisë së Shtetit dhe Policisë spanjolle, u bë e mundur kapja në Spanjë dhe arrestimi me qëllim ekstradimi, i një shtetasi shqiptar shumë të kërkuar, i cili ishte i shpallur në kërkim ndërkombëtar për krime kundër personit.
I shumëkërkuari qarkullonte në Spanjë, me dokumente të falsifikuara.
Në vijim të operacioneve të njëpasnjëshme të zhvilluara në bashkëpunim me homologët, falë punës hetimore të kryer nga strukturat hetimore të Policisë së Shtetit, për lokalizimin dhe kapjen e personave me rrezikshmëri të lartë shoqërore, që janë të shpallur në kërkim ndërkombëtar, falë shkëmbimit të informacionit në kohë reale, me homologët spanjollë, në kuadër të operacionit “Seville”, u kap nga Policia spanjolle dhe u arrestua, me qëllim ekstradimi, shtetasi i shumëkërkuar G. F. alias G. M. alias F. O., 40 vjeç, nga Shkodra.
Ky shtetas, në momentin e kapjes nga Policia, mbante një kartë identiteti bullgare të falsifikuar, me gjeneralitete R. I., dhe një sasi lënde narkotike, të cilat janë sekuestruar nga Policia.
40-vjeçari ishte shpallur në kërkim ndërkombëtar nga Interpol Tirana, pasi Gjykata e Posaçme Kundër Korrupsionit dhe Krimit të Organizuar i ka caktuar masën e sigurisë “Arrest në burg”, për veprat penale “Rrëmbimi ose mbajtja peng e personit”, kryer në bashkëpunim dhe “Prodhimi dhe mbajtja pa leje e armëve, armëve luftarake dhe e municionit”.
Ky shtetas dyshohet se në bashkëpunim me shtetas të tjerë, në vitin 2020, në Kamzë, Tiranë, ka marrë peng shtetasin J. P.
Interpol Tirana po punon për ekstradimin e këtij shtetasi drejt vendit tonë.
