Presidenti i Iranit ka paralajmëruar rifillimin e programit bërthamor të vendit “brenda orësh”, nëse Shtetet e Bashkuara vendosin sanksione të tjera ndaj Republikës Islamike.
Hassan Rouhani është shprehur gjithashtu se programi do të ishte më i avancuar sesa ai që u ndërpre në vitin 2015, kur Irani pranoi të ndalonte aktivitetet bërthamore si pjesë e marrëveshjes së arritur me fuqitë botërore.
Irani pretendon se sanksionet e njëanshme nga SHBA, që shënjestrojnë programin e raketave balistike të vendit, shkelin marrëveshjen ndërkombëtare.
Ndërkohë, Shtetet e Bashkuara shprehen se testimet raketore të Iranit kanë shkelur rezolutën e Kombeve të Bashkuara, e cila miratoi marrëveshjen bërthamore dhe i bënte thirrje Iranit “të mos ndërmerrte ndonjë aktivitet të lidhur me raketa balistike të afta për të transportuar armë bërthamore, përfshi edhe teknologjinë për lëshimin e këtyre raketave”.
Për Iranin, raketat që ka testuar nuk janë të dizenjuara për të transportuara koka bërthamore, ndaj dhe Teherani këmbëngul se programi bërthamor i tij është tërësisht paqësor.
Presidenti amerikan Donald Trump ka kërcënuar vazhdimisht se do të tërhiqet nga marrëveshja bërthamore, e pas testit raketor të fundit të janarit, administrata e tij deklaroi se “SHBA nuk do të bëjë një sy qorr ndaj veprimeve armiqësore dhe luftënxitëse të Iranit”.
Edhe pse Shtetet e Bashkuara pranojnë se testi nuk ishte “një shkelje e drejtpërdrejtë” e marrëveshjes bërthamore, vendosën sanksione ndaj 25 individëve dhe entiteteve të lidhura me programin raketor dhe Gardën Revolucionare.
Sanksione të tjera që shënjestronin 6 kompani iraniane u njoftuan në fund të korrikut, pas lëshimit nga Irani të një rakete të aftë për të dërguar një satelit në orbitë./panorama/
