![](https://www.shkodraweb.com/wp-content/uploads/2023/12/fiesta-mbulohett-2023-1-1024x536.jpg?x87856)
Pas rreth 30 viteve në karabina, mbulohet edhe një nga ndërtesat në zemër të pedonales “28 Nëntori” në Shkodër. Ditën e sotme, ndërtesa 3- katëshe, vazhdim i ish- Fotoketës “Marubi”, ka fshehur një imazh aspak të bukur.
Një ndërtesë private, e cila kishte nisur të ndërtohej pas viteve ’90, kishte mbetur pa u përfunduar. Shpesh herë, jo vetëm nga qytetarë shkodranë, por edhe turistë vendas e të huaj, e fotografonin dhe e shpërndanin si imazh “të çuditshëm” në rrjetet sociale.
Në bashkëpunim me pronarët, Bashkia Shkodër ka mundësuar mbulimin e saj, duke dhënë imazhin e një ndertese të përfunduar tashmë, me ngjyra në stilin e ndërtesave të kësaj pedonaleje.
Në katin e parë të ndërtesës, është një nga baret më të frekuentuara të pedonales dhe tashmë, heqje e imazhit të ndertesës së papërfunduar, i shton vlerat edhe vetë lokalit, krijon edhe një pamje më të këndshme për syrin.
Nisma e Bashkisë Shkodër nisi me një ndertesë private tek “Truma e Dugajëve të Reja”, për të vijuar me ish- Thertoren tek Ura e Bunës dhe shpresojmë të vijojë edhe në zona të tjera muzeale të qytetit.