![](https://www.shkodraweb.com/wp-content/uploads/2021/02/Skender-Gjinushi.jpg?x87856)
Skënder Gjinushi rizgjidhet në krye të Akademisë së Shkencave, me 51 vota pro dhe 2 kundër. Votimi u mbajt paraditen e sotme (20 tetor 2023) në Akademinë e Shkencave pa praninë e mediave dhe me dyer të mbyllura. Media nuk u njoftua sot për procesin e votimit dhe shpjegimi që iu dha gazetarëve prej Akademisë ishte përmes statutit të saj, ku në mungesë të debatit, mosprania e medies është legjitime.
Ndërsa akademiku Vasil Tole i cili rikandidoi për postin e zv.kryetarit, u zgjodh me 50 vota pro dhe 3 kundër.
Skënder Gjinushi u propozua për kryetar nga tre anëtarë: Akademikët Nestor Thereska, Arben Merkoçi dhe Akademiku i Asociuar Adrian Civic. Gjithashtu këta propozuan dhe kandidaturën e Vasil S. Tole për funksionin e zëvendëskryetarit, në pajtim me nenet 15 e 16 të Statutit. Në komisionin e Votimit për mbajtjen e zgjedhjeve në Akademi, ishin anëtarë akademikët Adem Bunguri, Mimoza Hafizi dhe Anila Hodaj.
Skënder Gjinushi drejton Akademinë e Shkencave prej 24 majit 2019 kur dhe u zgjodh kryetar i Akademisë së Shkencave. Edhe atëherë kandidonte i vetëm në garë.
Pak kohë më parë u miratuan ndryshimet e ligjit për Akademinë e Shkencave që i lejon kryetarit të Akademisë (po ashtu edhe zv.kryetarit) një mandat të dytë, dhe u hoq kufizimi i moshës deri në 75-vjeç. Kjo bëri që rikonfirmimi i krerëve aktual të ASH-së të mos ketë pengesa.