![](https://www.shkodraweb.com/wp-content/uploads/2020/09/arjan-peraj.jpg?x87856)
Kishte konfirmuar pjesëmarrjen në garën për kryetar të PD Shkodër në zgjedhjet e ditës së neserme, por sapo ka njoftuar tërheqjen zyrtarisht. Arian Peraj, në një postim në Facebook thotë se nuk do të jetë në listën e kandidatëve.
Pas kësaj terheqje, e pesta në radhë nga 9 emrat e ardhur nga qendra, mbeten vetëm 4 kandidatë. Arben Lushaj, Elvis Deda, Gjenarin Kapcari dhe Vildana Gushta, janë akoma në kandidim. Nuk përjashtohet të ketë edhe ndonjë terheqje tjetër të mundshme.
PUBLIKIMI I ARIAN PERAJ NË FACEBOOK
Në respekt të :
– dinjitetit dhe personalitetit tim familjar;
– ruajtjes së vlerave morale dhe të emrit tim të krijuar me sakrifica, mund dhe ndershmëri;
– në ruajtje të së sotmes dhe të ardhmes së partisë në të cilën u angazhova krejt i ri dhe sot jam thinjur pa e tradhëtuar, përfituar, shitur apo koritur asnjëherë, deklaroj :
Dorëheqjen nga gara për Kryetar i Partisë Demokratike Shkodër, duke i lënë vend për konkurim kolegëve të tjerë me urimin fitoftë më i miri !
Asgjë nuk më largon nga kontributet dhe dashuria për partinë demokratike, por në seriozitet të vlerave dhe ruajtje të personalitetit tim mendoj se qëndrimi im i fundit i shërben më shumë sesa konkurimi jo i barabartë, momentit delikat që po kalon PD.
Falenderoj secilin nga propozuesit e emrit tim, ato që më mbështetën dhe më suportuan në këtë ditë fushatë zgjedhore dhe ju deklaroj se u jam mirënjohës dhe i përuluar para jush duke ju premtuar kontribute dhe besnikëri ndaj Partisë Demokratike.
Urime konkurruesve dhe fituesit .