Shërbimi Meteorologjik Ushtarak bëri të ditur se për ditën e premte vendi ynë do të vijojë të ndikohet nga kushte moti të paqëndrueshme për shkak të masave ajrore të lagështa me origjinë jugperëndimore.
Në pjesën e parë të ditës në zonën e veriperëndimit reshje shiu të vazhdueshme me intensitet mesatar dhe hera-herës deri të lartë në formën e rrebesheve dhe stuhive. Prej orëve të mesditës deri në orët e vona të mbrëmjes reshjet me intensitet mesatar deri të lartë shtrihen në një pjesë të madhe të territorit (përjashtuar pjesërisht jugperëndimin dhe juglindjen).
Në zonën e Alpeve reshje dëbore me intensitet të ulët ndërsa në relievet malore në lindje në lartësitë mbi 1200 metër reshje të dobëta dëbore. Mjegull e dendur/mjegullinë dhe shikim i reduktuar për shkak të reshjeve të shiut.
Era do të fryjë me drejtim juglindje – jugperëndim me shpejtësi mesatare 2 – 8m/s. Përgjatë vijës bregdetare dhe zonave luginore era me shpejtësi 10 – 14m/sek. Valëzimi në dete i forcës 2-3 ballë.
