![](https://www.shkodraweb.com/wp-content/uploads/2024/02/emilia-koliqi-bashkia-shkoder-2024-1024x537.jpg?x87856)
Bashkia Shkodër, ashtu si qeveria shqiptare, po tregon çdo ditë e më shumë, rritje të autoritarizmit dhe po refuzon transparencën dhe llogaridhënien. Me miratimin e buxhetit të vitit 2024, numri i punonjësve të Bashkisë sëbashku me Institucionet e varësisë nga 1100 punonjës do të ulej në 999, pra me 101 punonjës.
Por që nga dita e hënë, numri i punonjësve, që i janë ndërprerë marrëdhëniet e punës deri tani, është sa dyfishi i atij të parashikuar në buxhet, pa llogaritë ato të cilët po njoftohen për transferime ose ulje në pozicione pune.
Kur do të ndalet spastrimi i punonjësve të Bashkisë Shkodër, pa asnjë kriter, duke i hapë vendin patronazhistëve?
Asnjë transparencë në faqen web të bashkisë, ku është e detyrueshme të shpallet vendimi strukturës për vitin 2024. Tek Programi i Transparencës, rubrika “’Mbi organizimin dhe funksionimin e Bashkisë/Administrata e Bashkisë’’, del mesazhi error:
NJOFTIM
Duke Ju kërkuar ndjesë .
Ju njoftojmë se browseri juaj ka dërguar nje kërkesë e cila përmban kod keq-dashës.
Hackerat në faqen e Bashkisë paskan hyrë vetëm tek të dhënat e strukturës. Për marrjen e informacionit, iu drejtova Bashkisë me shpresë të marr përgjigje.
Të gjithë punonjësit do t’í drejtohen Komisionerit për Mbikëqyrjen e Shërbimit Civil, gjykatave, ku përveçse kërkesës për kthimin në pozicionin e mëparshëm ose në një pozicion të barazvlefshëm do të kërkojnë edhe shpërblimet financiare për dëmin që i është shkaktuar.
Qeveria shqiptare deri në fund të vitit 2021, detyrimet e prapambetura për vendimet gjyqësore ku bëjnë pjesë edhe ato të largimeve nga puna, llogariteshin në 3.1 miliard lekë.
Dhe Bashkia Shkodër, që deri më sot ishte bashkia ekselente, pa asnjë detyrim të prapambetur, do të kthehet në një bashki me borxhe.
Të vetmit që penalizohen janë shkodranët, të cilët do të paguajnë kushedi për sa vite, urdhërat politikë të Kryetarit të Bashkisë. /Nga Emilia KOLIQI, deputete e Shkodrës, publikuar në Facebook/