A ngjajnë programet e Bardh Spahisë dhe Benet Becit, që garojnë në Shkodër njëri për t’u rikonfirmuar në krye të Bashkisë, i mbështetur nga opozita, tjetri për të marrë bashkinë për herë të parë me mbështetjen e PS?
Në një intervistë për emisionin “Pa Censurë”, kryebashkiaku në detyrë, Bardh Spahia tha se programet e tyre janë krejtësisht të ndryshëm, teksa ato të kundërshtarit politik i konsideroi “vetëm vizatime 3D”.
“Janë vetëm në dukje të ngjashëm, por janë realitete krejt të ndryshme. Programi ynë është konkret dhe i mbështetur në një buxhet trevjeçar, pra i zbatueshëm. Beci ka vetëm vizatime 3D, që nuk janë as risi. Edhe ato janë projekte të Bashkisë së Shkodrës, siç është projekti për Hyrjen e Shkodrës, që përfshin Portin dhe Parkun e Rekreacionit. Projekti u miratua nga të gjitha hallkat qeveritare, por u anullua për t’iu çuar një studioje të huaj arkitekture dhe tani paraqitet si risi, kur në fakt nuk është. Projekti është diskutuar me ne edhe në Bashkinë e Shkodrës gjatë vitit të kaluar”, u shpreh Spahia në emisionin “Pa Censurë”.
Kandidati i vetëm i opozitës në Shkodër, Bardh Spahia tha se projekti i tij për Shkodrën me zhvillim të qëndrueshëm ekonomik bazohet në tre kolona kryesore: Shkodra inovative, që orienton qytetin drejt Teknologjisë së Informacioni dhe Energjisë së Gjelbër; Përmirësimi i Shërbimeve dhe Shkodra Turistike.
Spahia vuri në dukje se qeveria duhet të zgjidhë pa vonesa të tjera problemin e lidhjes së Shkodrës me Tiranën përmes zgjerimit të rrugës, si dhe të financojë zgjerimin e urës së Drinit në hyrje të Shkodrës për të çliruar trafikun nga ajo që ai e quan gangrenë, të lënë qëllimisht, sipas tij, në degradim nga qeveria.
