Kreu i Partisë Bindja Demokratike, Astrit Patozi, në një postim të bërë në faqen e tij në Facebook, duke ironizuar qeverinë, shprehet se ndërsa në muajin shtator premtohen ndryshime të mëdha politike, në fakt nuk ndodh asgjë.
Premtimet të cilat lihen gjithnjë për në ditët e para të shtatorit, shprehet Patozi, nuk ndodhin kurrë, por kjo nuk i pengon “fantazistët për t’ia nisur nga e para, sa herë që mbarojnë ditët e nxehta të verës.”
“E bukura qëndron se këto ngjarje të kaq shumë ëndërruara pritet të vijnë nga të njëjtët personazhe dhe forca politike, që fajësohen dhe mbahen përgjegjëse për gjendjen dëshpëruese të vendit deri më 31 gusht, që na kanë sjellë peshqesh kriza dhe skandale të tilla të rënda, të cilat në çdo vend tjetër do t’i kishin hedhur në plehra disa herë të gjitha qeveritë e korruptuara, bashkë me opozitat e paafta korresponduese”, shprehet ai.
Reagimi i plotë:
PËR ATA QË PRESIN “MREKULLINË” E SHTATORIT
Nuk mbahet mend sa vite u bënë që në vjeshtë premtohen të ndodhin zhvillime të papara politike, për të cilat flitet se do t’ia ndryshojnë si me magji faqen Shqipërisë.
Ato nuk realizohen kurrë, por kjo nuk i pengon aspak fantazistët për t’ia nisur nga e para, sa herë që mbarojnë ditët e nxehta të verës.
Duke na kujtuar një melodi të vjetër të viteve të fundit të komunizmit me titullin patetik “Mirupafshim në shtator”, ndër të rrallat krijime të huaja, që konsideroheshin muzikë e parrezikshme dhe e lejuar nga regjimi i asaj kohe.
E bukura qëndron se këto ngjarje të kaq shumë ëndërruara pritet të vijnë nga të njëjtët personazhe dhe forca politike, që fajësohen dhe mbahen përgjegjëse për gjendjen dëshpëruese të vendit deri më 31 gusht.
A thua se për ta ka qenë problem stina, që na kanë sjellë peshqesh kriza dhe skandale të tilla të rënda, të cilat në çdo vend tjetër do t’i kishin hedhur në plehra disa herë të gjitha qeveritë e korruptuara, bashkë me opozitat e paafta korresponduese.
