![](https://www.shkodraweb.com/wp-content/uploads/2023/11/IMG_8234-1024x536.jpeg?x87856)
OSHEE ka njoftuar mbrëmjen e sotme pas përballjes së vendit me reshjet intensive të shiut se brigadat e OSSH vijojnë punën në terren, ku prej 7 orësh janë angazhuar për riparimin e defekteve shkaktuar nga dëmtimi i linjave prej motit të keq.
Sipas tyre reshjet e shiut dhe shkarkesat atmosferike sollën avari në disa pjesë të rrjetit elektrik, si rrëzim/thyerje shtyllash, prezencë uji në kabina, këputje përcjellësi në linjat ajrore, etj.
Aktualisht puna vijon me ritme të kënaqshme, pavarësisht se moti i keq pengon elektricistët të avancojnë më shpejtë me proceset e operimit.
Në raport me informacionin e orës 17:00, ka një përmirësim të furnizimit me energji elektrike me 73% për zonat e prekura nga defektet e motit të keq.
Në njoftimin e tyre OSHHE thekson se linjat e tensionit të lartë 35kV dhe n/stacionet kanë punuar rregullisht, ndërsa linjat që furnizojnë objektet e rëndësisë së veçantë janë në funksion të plotë.