Në kulmin e sezonit gripal në Urgjencën e Pediatrisë bëhen gjithnjë e më të gjata radhët e prindërve që presin të vizitojnë fëmijët e sëmurë.
Por sot pritja e gjatë ka shkaktuar sherr mes dy prindërve. Mësohet se situata është acaruar deri në atë pikë sa njëri prej tyre, që siç thonë burimet pranë QSUT-së ishte polic, ka nxjerrë edhe armën për të kërcënuar tjetrin.
Në ato momente është shkaktuar panik jo vetëm në radhët e prindërve dhe fëmijëve që ndodheshin në korridor por edhe të stafit mjekësor të Urgjencës së Pediatrisë.
Mësohet gjithashtu se për këtë situatë është lajmëruar policia, e cila ka shoqëruar të dy baballarët e përfshirë në konflikt.