Aleksandër Frangaj i është përgjigjur Lulzim Bashës fill pas akuzave të forta që i adresoi ky i fundit duke i dërguar një mesazh publik se po manipulonte opinionin publik për llogari të Sali Berishës.
Frangaj ka ironizuar kryedemokratin duke e këshilluar që të shtojë orët e gjumit dhe të reduktojë daljet televizive. Përplasja e tyre erdhi pas mbështetjes që pronari i TV Klan po i jep aksionit të Sali Berishës kundër Shteteve të Bashkuara, Lulzim Bashës dhe Edi Ramës.
Kreu i PD e konsideroi më herët si “llum” duke i kujtuar paratë që i ka marrë taksapaguesve shqiptarë në formën e reklamave gjatë qeverisjes “Berisha”. Le të kujtojmë se Frangaj ka mundur të përfitojë së paku 16 milion euro reklama publike, duke mos llogaritur këtu përfitimet nëndorë që e shndërruan atë shumë shpejt në një nga pasanikët e Tiranës.
“Kaotik në përgjigjet e tij, kryedemokrati Basha edhe ankohet, por edhe nuk ankohet ndaj gazetarëve të Klanit. Meqë me ne të lajmeve nuk e paska inatin, ndoshta e ka me korrespondentët e Aldos së emisionit të mëngjesit, ose me këta të emisionit të gatimit për ndonjë recetë më të mirë se të tijat, ose larg qoftë me ata të Klanifornias që janë totalisht të pakontrollueshëm.
Kreu i PD, z. Basha, dukshëm duket që e ka humbur qetësinë nga zhvillimet e brendshme e sidomos që prej nisjes së Foltores me qytetarët nga Sali Berisha, por edhe nga përplasjet me deputetet e tjerë, ndaj të cilëve ka nisur të marrë dhe masa siç ishte rasti i Flamur Nokës dje, sepse dhe ky i fundit në fakt e bëri baltë duke folur pak si shumë kundër tij.
Qartazi kuptohet që stresi i është rritur në maksimum, por që ta kalojë sa më shpejt këtë moment të vështirë, ne të lajmeve të Klanit një këshillë mund t’i japim zotit Basha, të shtojë orët e gjumit dhe të dalë sa më pak në televizor…”, thuhet në reagimin e Frangajt.
