Ditën e djeshme është mësuar lajmi i trishtë për ndarjen nga jeta të Raffaella Carra, një yll i spektaklit dhe televizionit jo vetëm për Italinë por edhe shumë vende të Europës e botës. Një nga emrat më të mëdhenj dhe të kompletuar të skenës, ekranit dhe muzikës, Carra ka shënjuar me emrin e talentin e saj një epokë në Itali e përtej.
Përme kanaleve televizive RAI, ajo ka qenë mjaft e njohur e preferuar edhe në Shqipëri. Megjithatë, ka personazhe që kanë patur një lidhje më të afërt me yllin e spektaklit italian. Një nga to, është Elhaida Dani, një yll i muzikës shqiptare por edhe italiane, e cila spikati pikërisht me spektaklin “The Voice” në Itali.
Pjesë e jurisë që zgjodhi më të mirën e konkursit shkodranen Dani, ishte edhe Raffaella Carra. Pikërisht këtë ka sjellë në vemendje duke publikuar një video të shkurtër, një vlerësim që Raffaella jep për Elhaidën. Videon shkodrania e ka shoqëruar edhe me dise rreshta, në formën e një komenti për ndarjen nga jeta të Carra:
“Është shuar një forcë e vertetë e natyrës. Një grua jo e zakonshme, e megjitthatë e pajisur me një thjeshtësi shumë të madhe. Faleminderit për çdo gjë që na ke dhuruar. Çfarë nderi që të kam njohur”, shkruan Elhaida Dani në publikimin e saj në Facebook. /ShkodraWeb/
