Një vit nga ndarja nga jeta e Mjeshtrit të Madh, Zef Deda. Familjarë, miq, të afërm dhe kolegët artistë kujtojnë me dhimbje aktorin e humorit shqiptar, Zef Deda. Në këtë një vjetor, në teatrin “Migjeni” u zhvilluan sot homazhe në nder të figurës së Zef Dedës.
Kolosi i humorit shqiptar u nda nga jeta një vit më parë, duke lënë pas një dhimbje të madhe për familjen, miqtë dhe artin mbarë shqiptar. Djali i tij, aktori Julian Deda u shpreh se Zef Deda është një mungesë e madhe për atë dhe familjen e artistit.
“Atëherë, ju falënderoj shumë, kaloi një vit i vështirë për familjen tonë. Nuk ishim mësuar me nejt pa atë, sepse prania e babës ka qenë dominante në shtëpi për nga energjia, për nga babai, për nga artisti, për nga çdo gjë dhe jo vetëm në shtëpi, por dhe jashtë shtëpisë.
Të dashur kolegë të babës, miq dhe familjarë ju falënderoj nga zemra që jeni sot këtu. Thotë një shprehje latine që njerëzit vdesin kur harrohen, pra nuk vdesin kur ikin nga kjo botë. Për sa kohë të ketë njerëz që kujtojnë, ai nuk vdes kurrë. Kështu që ai e meriton të kujtohet përjetë, të paktën sa të ketë jetë , ne pastaj më mbrapa punë tjetër. Kishte qejf të ndihmonte njerëzit.
Mua personalisht më mungon ajo telefonata jo vetëm e përditshme, por edhe e përjavshme, pasi mbaroja atë punën teme, atë spektaklin tem, më mungon ajo telefonata. I mungon mamës teme. Ajo do me dal por nuk ka me kë të dalë. Na mungon të gjithëve”, tha Julian Deda në fjalën e tij për homazhet e të atit.
Disa prej miqve, po ashtu emra të mëdhenj të humorit dhe artit shqiptar shprehen se Zef Deda ishte unik si aktor por edhe si njeri.
Zef Deda, aktori i humorit i qindra roleve lindi më 27 korrik 1950 ndërsa u nda nga jeta në moshën 73-vjeçare më 24 nëntor 2023. Zef Deda do të mbetet në memorien e çdo zemre shqiptare si një kolos i humorit që përmbi 50 vite shënjoi emrin e tij në panteonin e artit e kulturës tonë kombëtare.
Zef Deda është një nga komedianët më të mirë të Shqipërisë, i cilësuar edhe si Charlie Chaplin i Shqipërisë. I njohur për rolet e tij e kryesisht si kunati i shokut Xhemal, apo për plastikën e jashtëzakonshme të një aktori shqiptar që mund të imitonte magjinë e Charlie Chaplin,
Zef Deda mbetet në memorien e shqiptarëve si një ndër artistët e rrallë të skenës që la një pasuri të madhe, po aq edhe shpirtin artistike që përcolli te dy djemtë, Julin dhe Marion, të dy artistë të njohur në vend.
Aktori i mirënjohur i humorit ka punuar për më shumë se 40-vite në Teatrin Migjeni të Shkodrës. Talenti i tij spikat që në moshë të vogël. Me një shkathtësi dhe me një plastikë të shkelqyër psiko-fizike ai arriti të realizonte qindra role artistike. Prandaj dhe është mjaft i dashur për publikun shqiptar, sidomos atë Shkodran.
Pas një shkeputje prej 6 vitesh, për shkak te emigrimit jashtë atdheut, ai kthehet në vitin 1996 në Shqipëri për të ushtruar profesionin e aktorit, të cilin e vazhdoi me shumë sukses.
Zef Deda është martuar me Rozina Dedën dhe ka dy djem, Julian Deda dhe Marjan Deda. Zef Deda gjithashtu ka interprertuar edhe shumë komedi si: “Vëllai nga babai”, “Kollovari”, “Big Brother Shkodra 1”, “Big Brother Shkodra 2”, etj.
