Rei Manaj vazhdon të shkëlqejë me fanellën e Barcelonës. Sulmuesi i përfaqësues shqiptare, po shfrytëzon çdo mundësi që po i jepet me katalanasit për të treguar formën e vet dhe sot ka shënuar përsëri me ekipin e parë.
I rreshtuar mes titullarëve në sfidën e sotme ndaj Zhirona, Manaj e ka kërkuar që në fillim golin dhe e ka gjetur në minutën e 24-t të sfidës. Pas një aksioni nga e majta, ai e kërkoi topin në qendër dhe i vetëm para portierit ia kaloi sferën mes këmbëve këtij të fundit për të çuar shifrat në 2-0 për ekipin e tij mes duartrokitjeve të tifozëve të pranishëm.
Por kur regjistrohej minuta e 37 e ndeshjes, ai bëri shenjë nga pankina dhe u ul menjëherë në fushë duke kërkuar ndihmën e stafit mjekësor të skuadrës.
Fizioterapistët e katalanasve e kuptuan se lojtari kishte probleme muskulore në këmbë, të shkaktuara pas një kërcimi në një duel në ajër dhe si rrjedhojë kërkuan menjëherë zëvendësimin e tij. Kështu, Manaj mbylli para kohe ndeshjen, edhe pse në fakt ishte planifikuar që të luante të gjithë pjesën e parë, duke i bërë vend në fushën e lojës blerjes së fundit të katalanasve, Memfis Depaj.
Në ndeshjen e parë të skuadrës në fazën përgatitore, Manaj shënoi 3 gola në suksesin 4-0 ndaj Gimnastik Tarragonës.
